Samsam midepensa sa apohang si Kong. Gullas

CEBU, Philippines - Ang apo ni Kongresista Eduardo Gullas sa unang distrito sa probinsiya nga si Samsam Gullas midepensa sa iyang apohan sa pag-usab niini og baruganan kabahin sa desisyon niining pagpabalhin sa merkado publiko sa Talisay City diha sa Lagtang gikan Tabunok.

Apan sama sa iyang apohan, si Samsam mibutyag nga ang usa ka maayong lider kinahanglang makamaong maminaw sa yangungo sa ilang mga konstituwente sama na lang sa pagpabalik sa terminal sa traysikol diha sa Tabunok.

“Sometimes, as a leader, we have to listen what the people have to say…. nganong magpatawag man ka og sulogoon sa katawhan kung dili ka magpasugo,” ni Samsam pa.

Matud usab ni Samsam nga karon lang bag-o naestorya sa iyang apohan ang mga drayber mao nga karon lang niini nahibaw-an ang problema sa trapiko ug sa mga drayber.

Gikatakda na usab karon nga pakigtagboan sa kongresista ang mga vendors sa Lagtang aron konsultahon kung unsay ilang gusto, matud pa ni Samsam mag-agad sila sa resulta sa konsultasyon.

Si Gullas miingon nga gi-presume na niya nga mobalik sa daang merkado sa Tabunok ang mga vendors ug kung mahitabo kini duna na silay plano kung unsay buhaton sa merkado sa Lagtang.

Kagahapon, si Senador Alan Peter Cayetano mibisita sa dakbayan sa Carcar ngadto sa factory og chicharon ug ampaw ni Carcar Vice Mayor Patrick Barcenas.

Ang Alayon sa lokal nga gipangulohan ni Kongresista Gullas ubos kini sa Nacionalista Party. Gikan sa Carcar si Cayetano uban sa grupo ni Samsam mihapit sa Talisay City hall diin nakighimamat kini kang Mayor Socrates Fernandez, Kongresista Gullas ug sa mga kawani diha sa city hall.

  Si Cayetano nagkanayon nga nagpasalamat siya sa pagsuporta ni Gullas ug sa ubang mga kandidato sa lokal. (BANAT NEWS)