Mga senior sa lalawigan angay pensionan–Soco

CEBU, Philippines - Ang paghatag og pinansiyal nga hinabang ngadto sa mga senior citizens sa lalawigan  maoy usa sa mga nag-unang himoon ni Glenn Soco kun molampos  siya  sa pagka-bise gobernador sa lalawigan sa Sugbo.

Kini iyang gipadayag ngadto sa mga molupyo  sa dakbayan sa Mandaue   sa  iyang   pagbisita   sa  mga kabarangayan sa maong  dakbayan  sa  miaging adlaw.

Si Soco kinsa kandidato  sa pagka-bise gobernador sa Sugbo  ubos  sa Independent  Party   maoy kaatbang nila ni acting Governor Agnes Magpale sa Liberal Party ug Ramon Boboy Durano 1V sa One Cebu Party.

Gipasabot niya nga kun nakahatag man ang uban nga mga lokal nga kagamhanan og pinansiyal nga hinabang sa ilang katigulangan sama sa dakbayan sa Sugbo wala’y katarungan nga  dili usab kini mahimo sa kagamhanan sa lalawigan sa Sugbo nga naila na nga number 1  nga  lalawigan sa nasud nga Pilipinhon.

Dugang tinguha ni Soco mao ang pagpausbaw usab sa gidawat nga honorarium sa mga Barangay Health Worker (BHW) health, aid, nutrition scholar, barangay tanod ug uban pa nga nagserbisyo sa kabarangayan sa lalawigan.

Ang lain niyang tinguha mao ang paghatag  sa  pundong salapi sa kagamhanan sa lalawigan ngadto sa panudlanan matag barangay aron magamit  dayon  nila  kini  sa ilang  mga  panginahanglan.

Matud pa ni Soco nga iya  na gipahibalo   ang  mga  molupyo  sa  kabarangayan sa habagatan ug amihanang bahin sa lalawigan  ning  iyang  mga  laraw.

Gani  naabot  si Soco  og  suroy  ngadto  sa mga bukirang  bahin  sa lalawigan   pinaagi  sa pagbaktas, pagsakay og traysikad o pagsakay og habal-habal. (Romeo T.  Limpangog/WC) (BANAT BALITA)