CEBU, Philippines - Gikuwestiyon ni kandidato sa pagka-gobernador ubos sa One Cebu, Kong. Pablo John Garcia kung may tulubagon pa ang kandidato sa mga campaign poster nga wala sa hustong lugar. Kini nunot sa gipasaka nga reklamo batok kaniya sa buhatan sa Commission on Elections.
Si Atty. Gloria Ramos, co-founder sa Philippine Earth Justice Center, Inc., ang nipasaka sa reklamo batok ni Garcia nunot sa giingong mga ilegal nga pagpamutang sa iyang campaign materials.
Si Ramos mipasangil nga ang mga campaign posters ni Garcia anaa gipamutang sa mga punoan sa kahoy, poste sa kuryente ug mga waiting sheds. Nanghinaut si Garcia nga adunay hulagway si Ramos nga ikapakita nga siya gyud mismo ang nagbutang sa campaign materials.
Gani nagduda pa si Garcia nga ang grupo ni Ramos ang namutang niini aron siya ang mapasanginlan.
Si Garcia mibutyag nga daghang campaign poster niya ang gipanglaksi ilabi na sa ikalimang distrito hinungdan nga siya nagduda nga gibalhin kini sa pagbutang sa dili saktong lugar.
Dugang nakapaduda sa tuyo ni Ramos sa pagsang-at sa reklamo mao ang nangagi niining pagpasang-at og mga kaso batok sa iyang igsoon nga si suspendidong gobernador, Gwendolyn Garcia. Gikwestiyon ni Pablo John si Ramos kung nganong siya ra ang gipasakaan og reklamo ug wala ang iyang kaatbang. “Is she blind or blinded by her hatred of the Garcias,†matud pang Pablo John. (Gregg M. Rubio/WC) (BANAT BALITA)