CEBU, Philippines - Gipaablihan kagahapon sa buntag ni Kongresista Eduardo Gullas sa unang distrito sa probinsiya ang parkingan sa traysikol diha sa daang merkado sa Tabunok.
Si Gullas kinsa magpapiling mayor sa siyudad sa eleksiyon sa sunod buwan miklaro nga dili pamolitika ang maong pagpabukas niya sa terminal. Gipasabot ni Gullas ang usa ka lider kinahanglang maminaw sa mga tawo nga iyang gipangulohan.
“Kinahanglang maminaw sa mga tawo…unya human niya og paminaw i-adopt and make a decision and that is an attribute of a good leader….dili kay tungod siya maoy lider ang iyahang gusto na lang gyud ang matuman,†ni Gullas pa.
Matud sa kongresista nakita niya ang kahuot sa trapiko diha sa lugar ilabi na diha sa ilawom sa flyover diin ang mga traysikol magpundo. Niadtong milabay’ng Huwebes gipatawag ni Gullas ang mga lider sa mga organisasyon sa traysikol lakip na sa traysikad ug iyang nasayran ang problema sa terminal. Gikatakda usab nga makigtigom sa mga vendor sa Lagtang si Gullas. Dunay mga nanggawas nga report nga posibleng tugotan na silang mobalik sa merkado sa Tabunok.
Sa laing bahin, si kanhi bise mayor Aberdovey Belleza kinsa independenteng kandidato nga nagpasubli posisyon nagkanayon nga nadutlan ang administrasyon sa iyang singgit nga pabuksan og balik ang kanhi merkado sa Tabunok. (Brenda D. Batuto/EIM) (BANAT BALITA)