Pamilya gipanigbas apil mga bata
CEBU, Philippines - Upat ka mga miyembro sa pamilya lakip na ang 14 ug 17-anyos niini nga anak ang samdan human kini gitigbas sa ilang paryente kagahapon sa kaadlawon sa Barangay Tutay, Pinamungajan.
Ang mga biktima mao sila si Maria Fe Montesa, 37; bana niini nga si Jose, 47; ug ilang duha ka anak nga si Jomari, 14; ug Christian, 17.
Si Maria Fe ug Jomari daling gidala sa Pinamungajan District Hospital human makaangkon og samad tinigbasan sa kamot ug siko samtang si Jose ug Christian gidala usab sa Vicente Sotto Memorial Medical Center human matigbasi sa ulo.
Ang kapulisan padayon karon nangita kang Teofilo “Pilo†Cenes nga daling misibat human sa insidente.
Matud ni Sr. Insp. Jaime Santillan, hepe sa kapulisan sa Pinamungajan nga si Cenes nakainom adtong tungora ug nagyawyaw sa mga karaang panagbangi batok sa pamilya Montesa.
Ang duha ka mga partido giingong naglinabayay og sakit nga mga pulong dihang sa kalagot ni Cenes mikuha kini og pinute dayong hagit sa mga Montesa.
Tungod sa kalagot giingong migawas ang magtiayong Montesa apan kalit silang gitigbas ni Cenes giapil usab niini ang duha ka mga bata. Nakuha sa kapulisan ang pinute nga gigamit sa suspek samtang kasong kriminal ang ipasaka batok kaniya. (BANAT NEWS)
- Latest
