Abril 27 non-working holiday sa Lapulapu

CEBU, Philippines - Gideklarar sa Malacañang nga special non-working holiday ang   Abril 27, 2013  sa dakbayan  sa Lapulapu  nga  magsaulog  sa maong  adlaw sa Kadaugan sa Mactan .

Kini  pinaagi  sa Presidential Proclamation 563 nga gipirmahan  ni  Executive Secretary Paquito Ochoa Jr. ubos sa mando  ni Presidente  Benigno Simeon Aquino III.  Ang  maong  deklarasyon  gibase  sa kamahinungdanon  sa  paghandom  sa  kombati  tali  ni Lapulapu  ug  Magellan  niadtong  Abril 27, 1521  nga  nakapabahag  sa ikog  sa  mga  Katsila  nga  mangtas  kaayo  sa panaugdaog  sa  mga  kabus  nga  mga  Filipino.

Gani  matag  Abril  27  hugopan  sa  mga  lokal  ug  langyaw  nga  mga  tumatan-aw ang  reenactment  sa  eskrima  ni   Lapulapu  ug Magellan  nga  sayon  kaayong  gipataopan  ni Lapulapu  sa  iyang  espada  ang  Katsila  nga  manggugubat  busa  miligdas  kini  sa yuta  uban  sa  mibuhagay  niyang  dugo  sa kamatayon.

Gawas sa  eskrima  ipasundayag  usab  ang  “Kadaugan Street Party”, “Rampada or Street Dancing”, “Reyna Bulakna Pageant”, ug “Higante” contest. (/WC) (BANAT BALITA)