CEBU, Philippines - Pasakaan karong adlawa og kaso ang Australian nga gidudahang nag-operate og cybersex den diha sa barangay Labangon ning siyudad sa Sugbu.
Si Drew Shobbrook,46, dad-on karong adlawa diha sa Cebu City Prosecutors Office alang sa ipasakang kaso nga paglapas sa Republic Act 10364 o Expanded Anti-Trafficking Act.
Si Shobbrook gidakop sa mga sakop sa National Bureau of Investigation-7 niadtong Miyerkules tungod sa reklamo sa tulo ka babayeng iyang kanhi trabahante nga misumbong nga nag-operate kini og cybersex business.
Dugang kasong ipasaka kaniya ang illegal possession of firearms ug violations of Child Trafficking. Nakuhaan siya og usa ka .45 pistol; usa ka .38 revolver ug upat sa mga trabahante niya mga menor de edad.
Naluwas pud ang 15 ka babaye dala ang upat ka menor de edad human sa ronda sa sakop sa NBI ug nakuhaan ang iyang 3-door apartment og 15 related computer items, sex toys, sex paraphernalia, botelya sa energy drink ug migamit usab kini og mga alyas sa opisyal nga mga dokumento.
Gisubay pa sa NBI kung nasayod ba ang tag-iya sa apartment sa negosyo sa suspek. Samtang sa report sa TV Patrol Central Visayas nasuta sa NBI nga Tourist Visa ra ang gihuptang dokumento sa maong langyaw.
Ang langyaw nangangkong ‘book keeping’ ang matang sa iyang negosyo ug dili ang gipasangil kaniya. (Mylen Manto ug Fiona Jane Bacuado, CNU Intern/EIM)