CEBU, Philippines - Nabulit sa samad pinusilan ang tibuok lawas sa 28- anyos nga lalaking gidudahang nalambigit sa operasyon sa ginadiling drugas human kini gipusil diha sa barangay Pulpogan sa lungsod sa Consolacion niadtong Miyerkules sa alas 6:20 sa gabii.
Ang biktima nga patay diha-diha mao si Alwin Siacor, 28, molupyo sa Upper Casili Consolacion samtang wala pa matumbok sa kapolisan si kinsa ang mamumuno sa biktima.
Matud ni PO2 Jovanni Mabano sa Consolacion Police dihang nahinabi sa Banat News nikuyog ang biktima sakay sa motor sa silingan nga si Cesario Tabotabo, 36 , apan pag-abot sa lugar mikanaog ang biktima samtang nagpaabot ang drayber.
Apan wala magdugay kalit lang miabot ang wala mailhing tawo ug gipusil ang biktima makadaghang higayon, si Tabotabo nangangkon nga wala gyud siya makakita sa mamumuno.
Sa pagrekisa sa mga polis sa patay’ng lawas ni Siacor, duna kini duha ka pakete nga gidudahang ang sulod shabu ug iyang cellphone, samtang katorse ka basiyo sa bala gikan sa wa pa matinong kalibre sa armas. Wa pa matino sa kapolisan kung unsay motibo sa krimen apan usa sa gidudahan ang kalambigitan sa biktima sa ilegal nga drugas.
Samtang usa kaTanley Laurente,33, nga giingong nangihi sa gawas sa ilang balay ang gipusil patay sa barangay Tuburan sa siyudad sa Danao niadtong Miyerkules sa alas 7:20 sa gabii.
Si Laurente naigo sa bukton ug paa ug patay na pag-abot sa Danao City District Hospital ug wala pa matino si kinsa ang mipusil kaniya ug sa motibo niini. (Darrel Carumba ug /EIM).