CEBU, Philippines - Mikabat sa 3 mil kapin ka mga dumadapig sa Liberal Party (LP) sa dakbayan sa Lapulapu ang mikuyog sa caravan ug mitambong sa proclamation rally nga gipahigayon sa mga kandidato niini sa milabay’ng Domingo sa gabii.
Sa unang higayon gipakita sa mga supporter ni Lapulapu LP mayoralty candidate Efrain Pelaez Jr. ug pito ka mga konsehal niini ang ilang pagpaluyo sa maong grupo. Usa lang ang ilang tinguha nga mao ang pag-ilis og bag-ong modumala sa maong dakbayan alang sa kauswagan sa panginabuhi sa mga molupyo sa maong lugar. Gisugdan ang maong kalihukan pinaagi sa usa ka caravan sa mga kadalanan palibot sa dakbayan sa Lapulapu ug dayon gihimo ang rally niini didto sa dakong hawanan sa Marina Mall. Gikalipay ni Pelaez ang iyang nakitang suporta sa mga Oponganon ug nanghinaut siya nga maghiusa pagbotar kaniya ug sa iyang mga kaubang kandidato ang maong gidaghanon. Atol sa rally si Pelaez mipadayag nga prioridad niya ang maayong panggoberno nga mohatag og patas nga tratamento sa mga trabahante niini.
Iyang gipasabot nga dili siya gusto sa liderato nga mohatag lang og maayong pagtagad sa mga duol sa ilang kasingkasing.
Gisaad usab ni Pelaez nga wagtangon niya ang mga kurakot o kiriwan nga mga opisyal ug empleyado sa city hall agi og pagsunod sa administrasyon ni Presidente Benigno “Noynoy†Aquino III ang pagpatuman sa “tuwid na daanâ€. Ang kalimpiyo sa palibot sa dakbayan sa Lapulapu ug maayong pamaagi sa paghakot sa basura nga wala mahatagi og igong pagtagad sa kasamtangang administrasyon gisaad ni Pelaez nga iyang himoon .
Lakip sa mipadayag sa ilang tinguha sa pagserbisyo sa mga Oponganon mao sila ni vice mayoralty candidate Ret. Gen. Reynaldo Berdin ug mga kandidato sa pagka konsehal nga sila si Thelma Jumao-as, Engr. Allan Amodia, Tony Dingcong, Dr. Ted Tojong, Atty. Fred Bensi, Renren Igot, Memei Magno ug Jonax Igot isip campaign manager. (BANAT NEWS)