CEBU, Philippines - Nakapiyansa na og P500,000 si Bella Ruby Santos sa Regional Trial Court alang sa temporary niyang kagawasan human mapriso tungod sa kasong may kalambigitan sa pagdagit ug pagpatay sa 6-anyos nga si Ellah Joy Pique. Apan nasayran nga wala pa kini mahatagi og release order gikan sa Regional Trial Court nga maoy nagkupot sa maong kaso.
Matud pa sa interview sa The Freeman, igsuong pamantalaan sa Banat News, wala mobutyag ang kampo ni Santos kung diin gikan ang kwarta nga gipang-piyansa niini.
Ang abogado ni Santos nga si Atty. Rameses Villagonzalo mihulagway nga “mere crap of paper†daw ang pag-file og motion for reconsideration sa kampo sa prosekusyon niadtong Biyernes sa hapon tungod kay paglangay-langay ra ni sa kaso ni Santos ug sa biktima.
Giangkon hinuon ni Villagonzalo nga mapugngan ang temporaryong pagpagawas sa iyang kliyente kung makakuha og temporary restraining order ang prosekusyon. Nangandam na ang pamilya ni Santos sa iyang paggawas ug gipangandaman na usab sa ilang kampo kung ugaling dunay temporary restraining order nga mogawas alkontra sa pagpiyansa niya.
Si Santos ug ang iyang uyab nga Briton nga si Ian Charles Griffiths gidakop tungod sa pag-kidnap ug pagpatay kang Pique niadtong tuig 2011.
Sa 11-pahina nga desisyon ni RTC Judge Ester Veloso niadtong Biyernes, gitugotang makapiyansa og tunga sa milyon ka pesos si Santos tungod sa kahuyang sa mga ebidensya nga gipresentar sa prosekusyon sa maong kaso. Sa pikas bahin, nabalaka karon ang amahan sa bata nga si Renante Pique tungod kay basin og mogawas sa nasud si Santos ug dili na motambong pa sa mga hearing sa kaso.
Gitataw sad ni Villagonzalo nga nag-expect na sila nga makapyansa si Santos kay sa siyam ka witness nga gipresentar sa kampo ni Pique, duha ra ang mikumpirma nga si Santos ang midagit sa bata. (BANAT NEWS)