DepEd nanghinaot naugdaw nga eskuylahan mailisan

CEBU, Philippines - Ang school superintendent sa Department of Education (DepEd) sa dakbayan sa Talisay nanghinaot nga mailisan dayon ang 10 ka mga classrooms sa elementarya ug high school sa Candulawan Elementary School  nga nasunog niadtong kataposang semana sa Marso niining tuiga.

Kahinumduman nga ang nahisgutang mga classrooms naugdaw gyud kini ug laing usa ka classroom sa high school ang nakan-an sa kalayo.

 Ang sunog nahitabo atol sa adlaw sa graduation ceremony sa maong tunghaan.

Ang maong mga classrooms nga nasunog karaan na kini ug gama sa gaay nga materyales hinungdan nga dali kaayo kining gikaon sa kalayo.

Si Talisay City DepEd superintendent Woodrow Denuyo mibutyag nga sa wala pa masunog ang maong nga classroom sa milabay’ng tuig duna na siya’y request ngadto sa national nga buhatan sa DepEd kabahin sa katukoran sa siyam ka mga classrooms sa elementarya ug high school nga usahon sa tulo ka andanang building kini pangandam sa kanunay’ng pagsaka sa gidaghanon sa mga estudyante.

Matud niya nga ang mao niyang hangyo nadugay og approve alang sa annual budget sa tuig 2012 apan iyaha na kining gi-follow-up nga maaprobahan ang realignment sa budget aron magahinan na og budget alang sa katukoran sa mga classroom nga ipuli sa mga nasunog.

Si Denuyo nanghinaot nga sa dili pa unta mobukas ang klase sa Hunyo matukoran na og laing building ang Candulawan Elementary School.   

Gibana-banang mokabat sa P10 milyones ngadto sa P11 milyones ang budget sa tukorong mga classroom.

Gibutyag ni Denuyo nga ang kagamhanan sa Talisay dunay gigahing budget isip counter-part sa budget sa DepEd ug mangayo sila og exemption sa Comelec niini tungod kay gamiton man sa katukoran sa laing mga classroom. Ang Candulawan Elementary School sa milabay’ng tuig duna kini 674 ka mga estudyante sa elementarya, 125 sa kinder ug 303 sa high school.

Ang kasagaran sa mga tunghaan sa Talisay nagkatag-katag ang mga classroom diin daku kini og konsumo sa hawan.

 Matud ni Denuyo nga duna sila’y programa karon sa “high rise medium” nga mga building diin daginot kini sa lugar apan daghang classroom ang mahimo. Ang dakbayan sa Talisay duna kini 25 ka tunghaan sa elementarya, 18 sa high school lakip na niini ang tulo ka night high school.

Sa milabay’ng tuig mikabat ngadto sa 28,349 ang tinun-an sa elementarya ug 11,661 sa high school ug matag tuig gilaumang mosaka kini sa halos usa ka porsiyento. (BANAT NEWS)