CEBU, Philippines - Giablihan na ang bag-ong kalsada sa Pakpakan Road sa barangay Basak dakbayan sa Lapu-lapu kagahapon alas 11:00 sa buntag.
Si Rev.Fr. Jamie Duero maoy nangulo sa pagbendisyon sa maong agianan atol sa pagbukas niini niadtong milabay’ng adlaw.
Diha sa maong kalihokan si Mayor Paz Radaza ug mga kaubanan niining mga opisyales sa siyudad.
Matud ni Assistant City Engineer Allan Pedrigal nga ang kalsada gisugdan og trabaho niadtong Pebrero 2 karong tuiga ug hingpit kining nahuman niadtong miaging Sabado.
Ang kalsada may gitas-ong 706.3 metros nga gigastohan og P9 milyones gikan sa pundo sa siyudad.
Ang City Traffic Management System (CTMS) mihangop sa bag-ong naablihang dalan tungod kay makatabang kini pagpaluag sa bul-og sa trapiko sa maong lugar.
Ang mga lumolupyo nga makabenepisyo ning maong dalan mao ang mga molupyo sa sitio Pakpakan, Sitio Sudtonggan, ug ang mga taga Barangay Suba Masulog, Suba Panas ug Suba-Basbas sa dakbayan sa Lapulapu. (BANAT NEWS)