CEBU, Philippines - Dili tanang kandidato sa Bando Osmeña Pundok Kauswagan (BOPK) ang tugotan nga makadiskurso atol sa rally sa Partido Liberal-BOPK adto sa atubangan sa Kapitolyo unya sa Abril 18.
Si Kongresista Tomas Osmeña nga maoy pangulo sa BOPK namahayag nga ang mga bag-ong konsehal sa north ug south district mao ra’y tugotan nila nga makasulti ibabaw sa stage.
Ang mga bag-ong konsehal nga tahasan sa pagpaila sa mga mosulti nga kandidato pagka-senador mao sila si Konsehal Michael Ralota, Konsehal Augustus Pe Jr., Zenaida Amores ug Gabriel Leyson.
Matud ni Osmeña nga ang pagsilbi nga mga tigpaila sa maong mga bag-ong konsehal makatabang kanila nga makit-an ug mailhan sila sa mga botante.
Si Osmeña mipasabot nga ang ubang kandidato sa BOPK ilado na sila kaayo sa katawhan ug gani nag-una sila sa mga survey.
Matud ni Osmeña nga dili magdugay ang rally sa Liberal Party ug BOPK anha atubangan sa Kapitolyo ug wala usab sila moawhag sa mga dumadapig gikan sa layo nga barangay. (/EIM) (BANAT NEWS)