CEBU, Philippines - Giawhag ni Mayor Michael Rama ang kadagkoan sa Ombudsman-Visayas nga dalion ang pagresolbar sa kaso nga gipasaka batok sa tulo ka engineer sa dakbayan sa Sugbo.
Matud ni Rama nga malipay siya kun dili na paabton og unom ka buwan sa Ombudsman ang pagresolbar sa kaso aron nga malibkas na ang pagbutang sa preventive suspension sa tulo ka engineer.
Ang tulo ka engineer naglakip ni Assistant City Engineer June Nadine Sison, Joel Pasatiempo ug Juanito Pua Jr. kinsa gimandoan nga dili na moreport sa ilang mga opisina.
Giangkon ni Rama nga apektado gyud ang mga trabaho sa Department of Engineering and Public Works (DEPW) tungod sa suspensyon.
Ang tulo nagmahay sa Ombudsman kay gisuspenso sila nga wala gani pangayoi sa ilang tubag sa reklamo ni Robert Montenegro nga mipasangil nga gipangayoan siya’g computer ug mahalong camera nilang tulo ug kay wala siya mohatag gilisud-lisod ang iyang proyekto.
Apan ang tulo ka engineer nanghimakak ug miingon nga nagduda silang ang pagdumili nila nga i-release ang P150,000 nga retention money sa kontrata ni Montenegro sa usa ka proyekto sa Barangay Adlaon.
Ang tulo ka engineer nangatarungan nga daghang depekto sa proyekto nga gihimo ni Montenegro mao nga ila kining gipakorehean usa nila i-release ang P150, 000. (/EIM) (BANAT NEWS)