Suspensyon sa tulo ka city engineers ipatuman ni Rama

CEBU, Philippines - Suspensyon sa tulo ka engineers sa siyudad sa Sugbu nga gipasanginlang nangayo og digital camera ug computer sa usa ka contractor ipatuman ni Mayor Michael Rama subay sa kamandoan sa Office of the Ombudsman-Visayas.

Matud ni Rama nga ang preventive suspension order nga gipatuman ngadto nila ni Assistant City Engineer June Nadine Sison, Engineers Juanito Pua ug Joel Pasatiempo wala magpasabot nga sad-an na sila sa kaso.

Ang tulo ka engineer nga sakop sa Department of Engineering and Public Works (DEPW) gikiha ni Robert Montenegro nga usa ka project contractor kang kansang retention fund sa iyang proyekto wala pa ihatag pagbalik kaniya.

Gituohan nga ang pagpasaka og kaso batok sa tulo ka engineer gitumong aron nga mapugos sila si Sison pag-release sa retention fund nga gipugngan tungod kay giingon nga dunay depekto sa proyekto nga gihimo sa mga sakop ni Montenegro.

Ang unom ka buwan nga preventive suspension order nga gimando ni Deputy Ombudsman Pelagio Apostol magsugod kun ang mga hingtungdan makadawat na sa kopya sa ilang suspension order nga gipirmahan ni Rama.

Hangtud kagahapon sa udto, si Pua pa lang sa tulo ka engineers ang nakadawat sa kopya sa iyang suspension order kay ang laing duha ka engineer mi-leave pa sa ilang trabaho.

Sila si Engr. Sison ug duha ka kaubang engineers mihulagway sa pagsuspenso kanila nga gilabanan sa Ombudsman ang bati nga proyekto nga gihimo sa mireklamo nga contractor.

Kun human sa imbestigasyon sa kaso mamatud-an nga ang tulo ka engineer walay sala sa gireklamo ni Montenegro, ang mga sinumbong makadawat sa ilang sweldo atul nga sila gisuspenso bisan og wala sila magtrabaho. (Rene U. Borromeo/EIM) (BANAT NEWS)