CEBU, Philippines - Pasagdan ra ni Mayor Michael Rama si City Health Officer Stella Ygonia ug ang usa niya ka section chief nga gipasakaan og kaso tungod sa pagdumili sa pagdawat sa death certificate nga gipreparar sa kanhi medico-legal officer sa National Bureau of Investigation.
Matud ni Rama nga dili siya manghilabot sa maong isyu tungod kay karon nga gipasakaan na og kaso sila si Ygonia ug si Dr. Eliseo Virtucio didto sa Ombudsman ug sa Cebu City Prosecutor’s Office, angay’ng huwaton kun unsa gyud ang tukma nga lagda.
Ang mga kaso nga gipasaka kanila naglakip sa paglapas sa Anti-Graft and Corrupt Practices Act, Code of Conduct and Ethical Standards for Public Officials and Employees ug Unjust vexation. Giawhag pa gani nga sila kuhaan sa ilang lisensya pagka -doktor.
Si kanhi NBI-7 medico-legal officer Gil Macato maoy mipasaka’g reklamo batok nila ni Ygonia ug Virtucio, ug giapil pa si regional direktor PNP Crime Laboratory Service (CLS) direktor Nestor Satur kay apektado siya sa pagsalikway ni Virtucio sa iyang mga giisyu nga death certificates.
Giapil ni Macato pagpasaka og kaso si Ygonia ug Sator tungod kay matud pa wala sila makabadlong sa gihimo ni Virtucio nga maoy hepe sa cadaver section sa City Health Department.
Si Macato nagsilbi nga "retainer doctor" sa lain-laing punerarya nga maoy tig-isyu sa mga death certificates niadtong mga mamatay lang diha sa balay nga wala maatiman og doktor.
Matud ni Macato si Sator apil nga nakigtagbo sa mga liaison officers sa lainlaing punerarya nga gipatawag sa kadagkoan sa City Health department ug wala kini mosulti nga mahimo ra nga ang death certificates andamon sa retainer doktor sa mga punerarya.
Si Macato nagkanayon nga dunay panahon nga kun si Virtucio dili mopirma sa giandam niya nga death certificates, ang mga liaison officers sa punerarya moadto ni Dr. Alma Corpin kinsa mopirma ra usab niini.
Kini maoy nakapatibuok sa iyang pagtoo nga dili illegal ang pagpreparar niya sa death certificates sa mga kliyente sa punerarya ug nga si Dr. Virtucio gusto lang nga maoy mopuli kaniya isip retainer doctor sa mga punerarya.
Ang Banat News naninguha apan wala pa gyud makontak ang tulo ka doktor aron sila makatubag sa isyu. (Rene U. Borromeo/EIM) (BANAT NEWS)