CEBU, Philippines - Diriyot maabo ang three-door apartment sa sunog nga miulbo didto sa F. Llamas St., barangay Labangon dakbayan sa Sugbo gumikan sa gikargahang bateriya sa cell phone kagahapon sa udtong tutok. Ang maong sunog giisa ngadto sa 2nd alarm nga midanyos og gibana-bana nga mokabat sa P150 mil.
Matud pa ni Myrna Dela Cruz, usa sa nag-abang sa usa sa mga lawak sa maong apartment nga sayo niini nakapanimaho sila og aso sa ilang dapit hinungdan nga ilang gisuta.
Unya nakurat na lang sila dihang ilang nakita nga nagsiga na ang taas nga bahin sa ilang silingang lawak hinungdan nga dali silang nakapangayo og tabang sa mga silingan sa palibot.
Apan nasagmuyo si Dela Cruz kay dugay kaayong milihok ang ilang mga silingan, maayo na lang kay mirespondi dayon ang kabomberohan.
Samtang matud pa ni Fire Marshall William Tacaldo nga ang maong apartment gipanag-iya sa usa ka Helen Delos Reyes kinsa wala sa maong higayon dihang nahitabo ang sunog.
Miingon si Tacaldo nga ang giabangang unit ni Rebecca Espino maoy nasunog tungod sa gi-charge niining battery sa cell phone.
Dugang pa ni Tacaldo sa pasiuna nilang pakisayod nasuta nga nagkadikit ang kuryente dihang milanay ang panit niini gumikan sa kainit samtang nagkarga ang bateriya sa cell phone ni Espino nga maoy na-ingnan sa kalit nga pag-ulbo sa kayo. (BANAT NEWS)