Kaso batok police official ipasaka karong adlawa

CEBU, Philippines - Gipaubos sa paraffin test ug gipailawom usab sa ballistic examination ang 9mm service pistol sa luyo-luyong hepe sa kapolisan sa siyudad sa Bogo kinsa gipasanginlang nipusil patay sa uyab sa iyang anak niadtong milabay’ng semana.

Ang ballistic examination gihimo diha sa Philippine National Police Crime Laboratory-7 sa Camp Sotero Cabahug, Cebu City niadtong Sabado. Matud pa ni PO3 Mary Joy Ylanan, ang Women’s and Children’s Desk Officer sa Bogo City Police Station,  kabahin sa proseso ang maong test alang sa pagpasaka og kasong kriminal batok kang Chief Insp. Ceferino Tabay.Karong adlawa gikatakdang ipasaka ang kaso diha sa Regional Trial Court in Bogo City.

Si Tabay gipasanginlang mikulata ug pagkahuman mipusil patay sa 17-anyos nga si Vincent Paul Montesclaros, niadtong Biyernes diha sa Barangay Guadalupe sa maong siyudad.

Ang mga ginikanan sa biktima nga sila si Paul ug Lilibeth Montesclaros mi-alegar nga gi-torture ni una pa gipusil ni Tabay ang ilang anak. Matud pa nila nabun-og ang nawong sa ilang anak.           

Ang ilang pagduda base lang sa hitsura sa ilang anak  tungod kay hangtud kagahapon wala pa ma-awtopsiya ang patay’ng lawas sa biktima. Sumala pa nga giangkon ni Tabay ang iyang nabuhat ngadto sa biktima tungod sa iyang dakong pagmahal sa iyang 16-anyos nga anak nga iyang naabtang nagkadugo ang ilong kauban ang biktima.            Matud pa niini, armado si Vincent niadtong tungora mao nga iyaha kining giunhan sa pagpusil aron panalipdan ang iyang kaugalingon, apan nagmahay siya sa resulta niini apan andam siyang moatubang sa kaso. (BANAT NEWS)