CEBU, Philippines - Unom ka mga bagitong polis ang mag-atubang og mga kasong kriminal ug administratiba human pasanginling ilegal nga mi-aresto ug misuway og kilkil og P40,000 sa duha ka mga tawo diha sa Muntinlupa City niadtong Miyerkules.
Ang grupo nadakpan sa mga sakop sa Philippine National Police Anti-Kidnapping Group (AKG) nga maoy gidangpan sa igsuon sa usa sa biktima.
Ang mga gidakop mao sila si Police Officer 2 Herminigildo Gajeto Jr. ug PO1 Ryan Manga tungod sa pag-kidnap kang Jenilind Rodriguez ug Kevin Bajar sa Purok 4, Sucat, Muntinlupa City.
Samtang ang laing upat ka mga polis nga nakaikyas mao sila si PO2 Mitchel Marcos ug PO1 Domingo Abarico Jr. sa District Holding and Accounting Section, Southern Police District; PO2 Rigor Octaviano sa Pasay City police; ug PO2 Dennis Quinto sa National Capital Region Police Office (NCRPO).
Sumala pa sa report, usa ka Michelline Rodriguez, igsuon sa usa sa gi-kidnap mitug-an sa kapolisan nga kalit nga nanulod sa ilang balay ang maong mga polis ug gipasanginlan ang iyang igsuon nga naghupot og ilegal nga drugas .
Matud pa ni Senior Superintendent Renato Gumban, director PNP-AKG, gidala ang duha ngadto sa buhatan sa usa ka “Chief Inspector Nacional†nga pangulo daw sa Anti-Terrorism Division of the NCRPO. Diin gikatahong midemanda og P40 mil apan napaubsan kini ngadto sa P12,000.
Tungod sa maong binuang midangop sa AKG hinungdan sa gilusad nga entrapment operation batok sa mga suspek ug pagka-rescue sa duha. Kasong robbery (extortion), unlawful arrest, arbitrary detention sa Revised Penal Code ug Violation of Omnibus Election Code ang gikatakdang ipasaka batok sa mga badlungong polis. (BANAT NEWS)