CEBU, Philippines - Pormal nang buksan karong adlawa sa Commission on Elections-7 ang Precinct Count Optical Scan (PCOS) machine demonstration center diha sa SM City, Cebu.
Tumong niini mao nga ma-familiarized sa PCOS ang publiko ilabi na kadtong bag-ong mga botante aron maandam sila karong eleksiyon sa Mayo.
Si Comelec-7 Regional Director Temie Lambino miawhag sa mga bag-ong botante sa pagbisita diha sa PCOS demo centers sa lower ground sa SM City aron makakita sila sa mga proseso sa paggamit sa maong makina.
Matud ni Lambino nga bukas usab sila bisan sa dili mga botante nga mosuway sa paggamit sa makina aron sila madasig sa pagparehistro ug pagbotar sa sunod nga eleksiyon.
Ang kadtong mga interesado paapilon sila sa “mock vote†ug ipakaon ang ilang balota sa PCOS machines.
Si Lambino nagkanayon nga ang pag-edukar sa publiko kabahin sa PCOS machine usa sa paagi aron makita nila nga walay angayang kabalak-an ang katawhan sa paggamit sa maong makina.
Sa 100 porsiyento sa rehistradong botante kasagaran 20 porsiyento niini ang dili mobotar. Ang PCOS demo center bukas kini sugod karong adlawa hangtud sa kataposang adlaw niining buwana.
Sa laing bahin, 1,400 ka mga PCOS machine technician alang sa Cebu ang naa na sa ikaduha ka adlaw nga training kagahapon. Sagad kanila gikan sa Department of Education samtang uban gikan sa IT industry. (BANAT NEWS)