DVMF di na modawat og hayop nga itahan sa tag-iya

CEBU, Philippines - Dili na basta-basta nga modawat ang Department of Veterinary Medicine and Fisheries (DVMF) og mga iro ug iring nga itahan sa ilang mga tag-iya gawas kun sila mobayad og P150 para injection ug sa pagparehestro ingon man napulo ka kilo nga pagkaon.

Matud ni City Veterinarian Alice Utlang nga usa sa ilang tumong nga pabayron ang gusto nga motugyan sa ilang mga binuhi nga iring ug iro mao ang pag-discourage kanila ug aron ipadayon nila ang pag-alima sa ilang hayop.

“Mao nay among gusto to discourage them to just give their pets away. Kun ila kana nga himoon gapaila kana nga mga iresponsable sila, magpatuga-tuga og buhi unya kun dili na sila makaatiman ihatag na lang sa goberno. Unya unsa may ipakaon namo anang ilang iro? Gaabuso sa goberno, puno nami sa iro, kami ila himoong killer,” ni Utlang pa.

Si Utlang mipahinumdom sa publiko nga ang Republic Act 8485 mosilot niadtong mga tawo nga mopasipala ug dili na moatiman sa ilang mga iro ug iring. Ang paagi sa mga kawani sa DVMF pagka karon dili na sama kaniadto nga sayon-sayonon ra og patay ang mga iro ug iring kay supak kini sa balaod.

Kaniadto  adunay mga kawani sa DVMF nga mosuroy aron manakop sa mga iro nga masakpang magsuroy-suroy sa gawas sa panimalay ug kadtong dili malukat lapas sa tulo ka adlaw hutdon og patay ug idungan sa paglubong.

Ang Humane Society International mipasidungog sa kagamhanan sa dakbayan sa Sugbo tungod sa pagsagop sa tukma nga paagi kun dakpon ang iro nga gamitan na og pukot sa tumong nga dili masakitan ang mananap.

Ang iro nga madakpan ilang ipasagop ug kadtong dili g’yud masagop, patyon nila apan ipaagi sa pag-injection og pangpakatulog nga dili sakit ang kamatayon sa iro. (/WC) (BANAT NEWS)