Joavan nagpa-blinker sa iyang Bighorn

CEBU, Philippines - Nakatawag sa atensiyon sa mga sakop sa media nga misunod sa caravan sa Alayon Party kagahapon ang usa ka kolor puwa nga Bighorn nga sakyanan nga nagtangag sa plakang YEZ-460 tungod kay duna kini gibutang nga blinker diha sa  atop dapit sa sa driver seat.

Ang maong sakyanan nakit-an diha dapit sa eskina San Roque ug Tanke dihang ang grupo sa Alayon paingon kini sa Tanke aron magtapok.

Ang nahisgutang sakyanan duna kini mga poster ni Cynthia Villar kinsa mikandidato pagka-senador ug nabati usab ang jingle ni incumbent mayor Socrates Fernandez kinsa mikandidato sa pagka-konsehal sa Talisay nga gipatugtog.

Nakita sa mga tigbalita si Joavan Fernandez maoy nagmaneho sa maong Bighorn tungod kay gipaubos man ang bintana niini dapit sa driver seat.

Kahinumduman nga ang presidente sa nasud nagdili sa paggamit og mga wang-wang diin siya mismo dili mogamit og wang-wang sa iyang mga lakaw.

Ang gitugotan lang nga mogamit og wang-wang mao ang mga sakyanan sa  bombero, police ug ambulansiya kung dunay mga alarma nga insidente o emerhensiya.

Sa laing bahin, kagahapon maoy opening salvo sa Alayon Party ug Liberal Party sa dakbayan sa Talisay.

Ang LP sa ilang opening salvo mitambong kini og misa diha sa Saint Joseph Parish sa barangay Tabunok sa alas 6:30 sa buntag dayon gisunod ang ilang caravan.  (BANAT NEWS)