Brgy Capt. Mopasaka’g kaso batok mayor sa Baybay

CEBU, Philippines - Gitatakdang mopasaka og kaso sud niining semanaha ang usa ka kapitan sa barangay batok ni Baybay City, Leyte mayoralty Candidate Malou “Malot” Galenzoga tungod sa pasangil nga pagpang-harass   sa maong  mga  opisyal ug organizer nga nakapagubot sa gipahigayong semi-final sa amateur singing contest sa barangay Ponponan, sa maong  dakbayan.

Si barangay Ponponan barangay Captain Veneranda “Dayang” Martinez mibutyag atol sa iyang pagpa-blotter sa kapolisan sa Baybay Police Station nga wala gyud mahinayon ang  maong singing contest human gubota  sa mga sakop ni Galenzoga ang gym.

Sa  ilang  pagpanghasi  giingong   gipanangtang ang wiring sa ilang sound system ug gipanglabay pa ang mga bangko, matud  pa  ni  Martinez  sa pakighinabi  niini  sa Banat News.

Gani tungod sa  maong  hitabo  mialibwag  og  panagan  ang  mga  tawo  sa kahadlok  nga  mahimong dugoon  ang  maong  kagubot.

 Kadtong  buot untang  mosaksi  sa maong kalingawan  namauli  sa ilang  mga  balay  sa  kahadlok  nga  mapagan  kun magkinaunsa   ug  labaw  na  nga  mikabad  og  panagan  ang  mga  contestant  unta  sa maong  bangga  sa kanta.

Midugang  si  kapitan Martinez  nga  nabun-og  usab  siya  dihang gidasmagan  siya  sa  kauban ni Galenzoga   didto  sa  gate sa gym nga ila   untang   sirad-an  gumikan s a pag-ataki  sa mga  sinaligan   ni mayoralty candidate Galenzoga.

Gibutyag ni kapitan Martinez nga ang maong amateur singing contest gipasiugdahan    ni incumbent mayor Carmen Cari ug mga kaubanan.

Nasayran   nga   ang  kampo ni Galenzoga   mopahigayon  unta og  pulong- pulong   sa maong  gym  apan  wala  kini  hatagi  og  permit  ni  kapitan  Martinez  tungod  kay  may  amateur  singing  contest  man  nga  ipahigayon  sa maong  dapit. 

Tinuod matud  pa  ni  Martinez  nga  mi-apply usab  og  permiso  gikan  sa butahan  sa kapitan  ang  kampo  ni Galenzoga   apan  tungod  kay  unang  naaprobahan  ang  letter   request sa  singing  contest , gibalibaran  ang   naulahi.Hinungdan  matud  pa  ni  Martinez  nga gumikan sa kalagot  sa  mga  sakop  sa Galenzoga gihurot  og  tangtang  ang  mga tarpaulin ni mayor Cari ug mga kaubang kandidato   ug  gipangilisan  sa ilang   mga poster.

Unya  wa  pa gyud  matagbaw ,  ang  gikutay  na  mga  wiring  sa sound system  gipanglarot.

Si kapitan Martinez   mianhi  sa Sugbo sa milabay’ng adlaw   kay  nakigsabot  sa iyang abogado  bahin  sa tukmang   kiha nga ilang ipasaka   batok ni Galenzoga   uban  sa  mga sakop niini.

Si Galenzoga maoy mo-atbang ni mayor Cari  sa umaabot nga eleksyon  sa Mayo 13 ning tuiga.

Nunot niini nag-iyahay  sa  pagpalanog  sa ilang opening salvo   sa pagbukas sa  kampanya  ang   mga lokal nga mga kandidato   ang  nagkadaiyang  partido  didto  sa dakbayan  sa Baybay  kagahapon.

Ang Liberal Party ( LP)   gipangulohan  ni mayor Cari ug sa iyang runningmate nga si vice mayor Mik Cari ug mga kandidato pagka-konsehal milusad  og motorkada gikan sa Baybay City gym, libot  ngadto sa Plaza Villa, Gaas, City Proper, ngadto  sa Plaridel, dayon  sa Maibog  ug  balik  ngadto  sa Plaza Baybay  nga gisalmotan sa liboan nila ka mga supporter  nga lunod patay gihapong mipadayag og suporta sa kasamtangang pamunoan sa maong dakbayan. (WC) (BANAT NEWS)