5 ka Sugbuanon mipasar sa real estate exam

CEBU, Philippines - Lima ka Sugbuanon, apil ang usa ka opisyal sa City Hall ug kanhi sakop sa media, nasulod sa napulo ka labing hawod sa bag-ohay pa lang gipahigayon nga Real Estate Broker Licensure Examination.

Ang lima ka Sugbuanon nga migawas nga labing hawod mao sila si Ariel Pantillo nga migraduwar sa University of San Carlos (USC) ug maoy nakakuha sa ikaduhang pwesto.

Si Anna Fiona Bojos nga migraduwar sa University of Cebu (UC)-Banilad;  Mark Maratas Angus sa University of the Visayas (UV), Jeanette Lynn Bermas sa University of San Jose Recoletos (USJR) ug Belleza Belen Villarta sa USC gihapon parehong anaa sa ikalima.

Samtang si Collin Rosell nga pangulo sa City Hall’s Division for the Welfare of Urban Poor (DWUP) nga migraduwar usab sa UC-Banilad maoy ikapito nga dapit sa pasulit.

Sa dul-an sa 3,000 nga mikuha  sa maong   pasulit si Jacob Tan Ng nga migraduwar sa Ateneo de Manila University maoy nangharus ug giila nga labing hawod sa tanan.

Ang rekord nagpakita nga sa 2,969 nga mikuha sa pasulit alang sa real estate broker licensure examination,  1,928 lang kanila ang nakapasar.

Si University of Cebu President Agusto W. Go nagplano nga mohatag og ganti sa iyang mga tinun-an nga mi-top sa  maong  eksamin.  (BANAT NEWS)