CEBU, Philippines - Gipatangtang kagahapon ni Atty. Aristotle “Totol†Batuhan ang mga dagku niya nga mga political campaign posters nga gibutang sa iyang mga dumadapig.
Matud ni Batuhan nga isip abogado ug nagtinguha nga mahimong magbabalaud nga morepresentar sa south district sa dakbayan motuman gyud siya sa balaud. Karon nga nagsugod na ang 45 ka adlaw nga kampanya alang sa mga lokal nga kandidato, gidili na ang pagbutang og campaign posters nga sobra sa 2x3 feet ang gilapdon alang sa posters ug streamers.
Alang sa mga leaflets, ang gidak-on sa usa ka bond paper mao ra ang gitugot sa Comelec ug kadtong molapas sa lagda mahimong mapasakaan og kaso.
Matud ni Batuhan nga wala na niya kinahanglana pa ang mga dagku nga billboards ug posters kay ang mga tawo sa south district nakaila na kun kinsa ang mga kandidato.
Wala hinoon magpaabot si Batuhan nga sundon sa iyang kaatbang nga si Konsehal Rodrigo Abellanosa ang iyang gihimong pagpatangtang sa mga illegal campaign posters.
Si Batuhan kandidato sa Team Rama samtang si Abellanosa sa Bando Osmeña Pundok Kauswagan (BOPK).
Apan si Abellanosa igo lang miingon nga siya maoy nag-una sa pagpanangtang sa mga dagku niya nga campaign posters apan si Batuhan miingon nga daghan pa kaayong dagku nga posters ang iyang kontra sa politika.
Si Batuhan nagkanayon nga gusto niya karon nga ang kampanya anha na ipaagi sa mga isyu mao nga wala gyud siya molubad sa iyang paghagit ni Abellanosa sa usa ka lantugi kabahin sa isyu.
Matud ni Batuhan nga mahimong ang isyu nga ilang lantugian mao ang isyu nga naka-benepisyo si Abellanosa sa iyang tunghaan tungod sa scholarship program sa dakbayan sa Sugbo. (BANAT NEWS)