Tulo ka guns for hire nadakpan

CEBU, Philippines - Tulo ka gidudahang gun-for-hire ang nasikop sulod sa usa ka kapilya ug nakuhaan og armas ug gituohang “shabu” niadtong Biyernes Santo sa gabii, diha sa Pitalo lungsod sa San Fernando.

Ang mga nasikop mao silang Randy Venegra, 39, taga Barangay Colon, Naga City; Ryan Fernandez, 32, taga Barangay Poblacion Ward II, Minglanilla; ug Obit Hequillo, 36, taga Barangay Lutac, Naga City.

Sa inisyal nga imbestigasyon sa kapolisan sa lungsod sa San Fernando, gikatahong sa wala pa masikop ang tulo giingong adunay gipahigayong panagtigum ang katawhan sulod sa kapilya San Vicente Ferrer Chapel kini aron ilisan ang ilang presidente.Apan giingong mipatim-aw ang tulo sulod sa kapilya ug nabantayang adunay nagbagal sa ilang mga hawak nga gikahadlokan sa mga mitambong sa meeting.

Tungod niini, ang barangay tanod daling nangayo og  tabang sa duha ka polis nga nag-roving nga silang SPO1 Francisco Salubre ug PO3 Reynaldo Binatero.

Ang kapolisan, daling miadto sa kapilya ug ilang gisusi ang maong mga lalaki ug wala na sila makaporma dihang naunhan sa mga polis ug gipangrekisa.

Nakuha gikan sa tulo ang kalibre .45 nga adunay lima ka bala, kalibre .38 nga adunay duha ka bala ug duha ka gagmay’ng pakete sa gituohang shabu.

Ang hepe sa kapolisan sa lalawigan sa Sugbo, Sr. Supt. Patrocinio Comendador mibutyag nga adunay posibilidad nga ang tulo mga gun-for-hire.  

 Dugang pa niini nga posible usab nga diha sila sa maong dapit aron sa pagmugna og kagubot. Gipadayag ni Comendador nga ila pang ipaubos sa imbestigasyon ang tulo.

Samtang sa pagsukit-sukit sa kapolisan ngadto sa tulo nangangkon silang  miadto sila sa maong dapit aron mamalit og kandila. (BANAT NEWS)