Dalagita gi-sex slave sa amahan

CEBU, Philippines - Usa ka amahan  kinsa mihimong  sex slave  sa iyang  dalagitang  anak nadakpan  sa kapolisan  didto  sa barangay Damolog, lungsod  sa Sogod  niadtong miaging hapon.

Giila  lang  sa ngalang  Boy, 37,  nagpuyo  sa usa  sa  mga  barangay  sa lungsod  sa Borbon,   amihanang bahin  sa lalawigan,  samtang  ang   giunay  niya  sa pagpanamastamas  nga anak   giila  lang  sa ngalang  Inday, 15, tinun-an  sa 3rd year high  school.

Si PO3 Rolinda Flores sa Women’s Desk sa Borbon Police   Station  mibutyag  sa Banat News   nga nadiskitahan  ang  maong  krimen dihang  nagpapirma og clearance   ang  biktima sa  iyang eskuwelahan.

Apan  pagkahuman  og  papirma wala  kini  mogawas    kay  nakit-an  niya  ang  iyang  amahan  nga suspek  nga  nag-atang  kaniya. Gipaabot  sa biktima  nga  moabot  ang  iyang  apohan  apan  gipugos  siya  sa iyang  amahan  sa  pagpapauli  sa  ilang  balay  kay  aduna  kuno  siya’y  mahinungdanong  tuyo  niini. Apan  gilugos  na  usab  ang  biktima didto  sa ilang balay  ug  gibiyaan  kini sa amahan  nga nagbilin  og  hulga  nga kun  manugilon  siya  patyon  siya  niini. Tungod  sa kahadlok  sa biktima  iyang  gitug-anan  ang  iyang  apohan  kinsa  milihok  usab  dayon  aron sa pagsumbong  ngadto  sa kapolisan.

Nasayran  nga  ang  biktima  didto  na  magpuyo  sa balay  sa iyang  apohan  tungod  sa  pagbinuang  kaniya  sa iyang  amahan  kinsa  mao  ray  iyang  kauban  sa ilang  balay  kay  ang  iyang  inahan  usa man  ka  Overseas Filipino Worker (OFW) samtang  ang  iyang  duha  ka manghud  tua  usab  mopuyo  sa ilang apohan.

Dihang  gisukit-sukit  na  sa kapolisan gitug-an sa biktima nga pipila ka tuig na siyang gihimo nga sex slave sa iyang amahan human  molarga  ang  iyang  inahan  ngadto  sa gawas  kay nanarbaho. Gani ang   ilang  mga  silingan   nakasaksi  nga  ang  biktima matag  adlaw  hinatud-kuha  kini  sa eskuylahan  sa  iyang  amahan.

Apan sa mga milabay’ng  mga bulan ang biktima naglikay -likay na  sa iyang amahan  ug  ang apohan na niining babaye ang  iyang pakuhaon sa  eskuwelahan  nga maoy  gisuk-an   sa suspek  kaniya.

Human  masayri  sa kapolisan  ang  hitabo  gipangita  dayon niini  ang  suspek   apan  didto  na  kini  hidakpi  sa balay  sa iyang  ginikanan  sa  Damolog.

Sa pagkakaron nagtingkagol  na  kini  sa prisohan   samtang gihikay ang kasong ipasaka batok   kaniya. (BANAT NEWS)