CEBU, Philippines - Dul-an tulo ka kilong shabu ang gikutaw sa tubig ug gi-flush sa kasilyas sa sala ni Regional Trial Court Branch 15 Judge Samuel Malazarte kagahapon.
Ang maong mga illegal nga drugas mga ebidensyang nasakmit gikan sa walo ka mga kasong na-promulgated sa sala ni Malazarte sukad pa niadtong tuig 2004 hangtud sa tuig 2012.
Matud pa ni Malazarte, sa walo ka mga kaso sa illegal drugs, tulo niini ang nadesisyonan na samtang nagpadayon pa ang lima. Mokabat sa 2.87 kilos ang gibug-aton sa maong shabu.
Matud pa ni Philippine Drug Enforcement Agency regional director Julius Navales kinsa maoy mibarog nga representante sa habig sa PDEA uban sa mga sakop sa media, mobalor og P21.2 milyon ang street value sa maong shabu.
Si Malazarte nagkanayon nga subay sa balaod, ang mga ebidensya sa kasong na-promulgate na sa hukmanan kinahanglang gub-on ilabi na ang mga illegal nga drugas aron dili kini ma-recycle kung dunay kiriwan og mga kamot nga makahigayon pagsulod sa ilang evidence room. (BANAT NEWS)