CEBU, Philippines - Si Mayor Michael Rama miingon nga dili tukma ang lakang sa Cebu City Council kun tinuod nga nagplano sila nga dili gahinan og budget ang Tribu Lumad Basakanon nga makasalmot sa Aliwan Festival sa Manila.
Gipahinumdoman ni Mayor Rama ang mga konsehal sa dakbayan nga makatulo ka higayon nga ang Tribu Lumad Basakanon nga gidumala sa iyang ig-agaw nga si Basak-San Nicolas Barangay Kapitan George Rama nakahatag og dungog sa dakbayan.
Ang Tribu Lumad Basakanon nakadaug isip Grand Champion sa Aliwan Festival sa Manila kaniadtong tuig 2005, 2006 ug 2007 human niini gipilde ang mga ilado kaayo nga contingent gikan sa lainlaing dapit sa nasud.
Matud ni Rama nga kun dili gayud mohatag og gahin ang Cebu City Council sa panggastos sa Tribu Lumad Basakanon nga makasalmot sa Aliwan Festival karong Abril 11 ngadto sa 13, mapugos siya nga mangita’g laing paagi.
Ang konseho sa dakbayan hinoon wala gayud moingon nga dili hatagan og budget ang Tribu Lumad Basakanon apan ang isyu gitugyan nila sa committee on budget and finance alang sa pagtuon.
Kapin sa tulo ka milyon ka pesos ang gipangayo nga budget sa Lumad Basakanon alang sa ilang plete, pagkaon, props ug uban pa nga gastohan.
Mga 300 ka tawo ang giingon nga mouban sa pagsalmot sa Aliwan Festival. (BANAT NEWS)