Taga Ormoc giluba’g kuwang-kuwang sa Argao

CEBU, Philippines - Ang biktima mao si Fernando Mendoza, 56, minyo ug taga Licoma, Ormoc City apan miadto  sa Argao  kay  mitambong   sa  lubong sa namatay niining paryente  sa maong lugar.

Si PO2 Alexander Lerio sa Argao Police Station mibutyag  sa Banat News nga ang biktima nagpalit  og  sigarilyo  sa silingang  tindahan  sa gisak-an niyang  balay.

Apan wala kini magtagad sa suspek kansang  ngalan wala  ikabutyag  sa kapolisan  kay nasabtan niyang  liso  kini og  pangisip busa  wala  siya  makabantay  dihang  gihansakan  ang  iyang  baba  sa kutsilyo  nga  dala sa maong suspetsado.

Nakadagan  ang  biktima ug nasalbar  ang  iyang  kinabuhi apan  samaran  sa baba. Wa siya gukda  sa suspetsado  kay nabadlong  kini  sa  mga  estambay  kinsa  maoy  mitawag  sa buhatan  sa kapolisan  ug  midakop  sa suspek. Ang biktima daling gihatud ngadto sa Isidro Kintanar Memorial Hospital sa Argao apan gibalhin sa  tambalanan  sa dakbayan  sa Sugbo.

Ang suspek  nagkagulkol  na  karon sa prisohan  sa  kapolisan  sa Argao  ug  nagpaabot  sa  kaso  nga  ipasaka  sa kabanay  sa biktima  batok  kaniya. (/WC) (BANAT NEWS)