Dunay foul play

CEBU, Philippines - Posibleng may foul play. Kini maoy unang pagduda sa mga imbestigador sa kaso sa pag-unay ug pagpinusilay sa manag-agaw nga polis nga parehong namatay niadtong Sabado sa gabii diha sa usa ka panimalay nga nahimutang sa sitio Eyha, Barangay Guadalupe ning siyudad sa Sugbo.

Kini base sa nakita  medico sa  legal nga si Dr. Nestor Satur sa Crime Laboratory nga maoy mipahigayon sa awtopsiya sa patay’ng lawas sa duha ka polis nga silang PO1 Anthony Gonzales, 29, kinsa nadestino sa Siquijor Provincial Police Office  ug si PO1 Rey Gabutan, 30, nadestino sa Guadalupe Police Station sa Cebu City Police Office (CCPO).

Matud pa ni Satur, nga base sa iyang paghiling sa mga lawas sa duha duna silay mga igo sa bala nga nakapahibulong kaniya.

Si Gonzales adunay igo sa bala sa iyang dughan nga milapos ngadto sa tuong bahin sa iyang kilid, samtang si Gabutan adunay pinusilan sa nagkadaiyang parti sa iyang lawas.

Apan gikatingala ni Satur kun nganong aduna siya’y igo sa iyang walang bahin sa tampihak nga giingong may “tattooing” ang igo niini.

Gawas niini, nakita ni Satur nga aduna pay pinusilan sa tangkugo si Gabutan.

Si SPO3 Rey Cuyos, ang imbestigador sa maong kaso mipadayag nga manguha pa sila og mga pamahayag sa mga saksi.

Ang pamilya ni Gonzales midangop na sa National Bureau of Investigation (NBI) aron mohimo og lahing imbestigasyon kalabot sa maong insidente.

Ang asawa ni Gonzales nga si April Rose ug pamilya, mipadayag nangita sila karun sa hustisya sa tinuoray nga nahitabo kaniya. Matud pa nga bisan ang mga kabanay sa duha dili makatuong mabaw ra kaayo ang hinungdan aron magpatay ang mag-agaw.

Matud nila suod ang duha ug magkababata pa kaniadto ug karong bisan sila pareho nang mga polis suod gihapon silang duha.

Matud pa sa asawa nga wala siya’y gibating kalagot sa duha ka polis nga silang PO3 Arnel Palanas ug PO2 Lejay Gumandal nga kasamtangan karun nga gi-hold sa kapolisan sa Homicide Section.

Apan tinguha sa asawa ni Gonzales nga unta mulutaw ang insakto ug hustisya alang sa kamatayon sa iyang bana.

“Tan-awon nato og justice will prevail ba gyud, kay lisod kaayo ang nahitabo sa akong igsuon uy,” matud pa ni Lyndon.  (BANAT NEWS)