Brgy. Fire Olympic gilusad sa Mandaue
CEBU, Philippines - Gipasiugdahan sa Bureau of Fire Protection (BFP) sa dakbayan sa Mandaue sa miaging Biyernes sa buntag ang Barangay Fire Olympic nga gisalmotan sa pito ka barangay sa pagtino sa ilang katakos sa pagtubag sa alarma sa sunog human sa ilang pagbansaybansay.
Si SFO1 Cefriano Codilla nga nahinabi sa Banat News miingon nga naglakip sa mga barangay nga misalmot sa maong indigay mao ang barangay Banilad, Casuntingan, Canduman, Tipolo, Labogon ug barangay Paknaan sa maong dakbayan.
Dugang pa niya nga ang maong indigay didto ipahigayon sa bakanteng luna sa Parkmall sa north reclamation area ang gitambongan usab sa mga opisyal sa kagamhanan nga naglakip kang Mayor Jonas Cortes ug uban pang mga opisyal sa dakbayan.
Matud pa niya nga ang maong indigay maoy kabahin sa ilang mga kalihokan sa Fire Prevention Month nga gibuksan niadtong Marso 1 ug matapos sa Marso 31 niining tuiga.
Gitataw ni SFO1 Codilla nga may madawat nga ganti ang mananaug sa barangay sa Fire Olympic nga mao ang libre nga snacks, t-shirt , ug uban pa. (BANAT NEWS)
- Latest
