CEBU, Philippines - Kritikal ang drayber sa motorsiklo ug ang angkas niini human madasmag sa puthaw nga railing ang motorsiklo nga ilang gisakyan didto sa kurbadahon nga bahin sa Sitio Tayong sa barangay Guimbuwangan lungsod sa Barili kagahapon sa alas 5:00 sa buntag.
Ang mga biktima mao si Juren Albarando,19, ulitawo, nga taga Guihulngan, Negros Oriental, ug ang angkas niini nga si Joel Tambig, hingkod, ug utility worker sa Dakay Construction nga nagbase sa lungsod sa Minglanilla nga taga Guihulngan usab.
Si SPO3 Elmer Opsema sa Barili Police Station mibutyag sa Banat News nga ang mga biktima gikan pa sa lungsod sa Minglanilla ug paingon sa pantalan sa Tangil, Dumanjug aron unta mamauli ngadto sa Negros.
Matud pa sa mga nakasaksi nga kusog kaayo ang dagan sa motorsiklo sa mga biktima dihang pag-abot niini sa kurbada nga bahin sa maong lugar, naglisud na sa pagkontrol ang drayber sa maong sakyanan ug mideretso kini pagdasmag ngadto sa railing daplin sa karsada.
Nagbuwag pagpanga-lagpot ang duha ka biktima gikan sa ilang motorsiklo ug pulos nabundak sa sementadong karsada ang ilang mga ulo.
Giingon nga gawas sa pagkabundak sa ulo, si Tambig nagusbat ang dagway dihang namusmos kini sa railing una molupad ug mitugpa sa karsada.
Ang duha dali nga gihatud ngadto sa Barili District Hospital apan gibalhin kini dayon ngadto sa tambalanan sa dakbayan sa Sugbo gumikan sa katandugon sa ilang kahimtang.
Dihang gisusi sa kapolisan ang gisakyang motor sa mga biktima giingong wala kini plate number. (WC)(BANAT NEWS)