Gidaghanon sa traysikol sa siyudad limitahan sa 500

CEBU, Philippines - Giaprobahan na sa Konseho sa dakbayan sa Sugbo ang ordinansa nga naglatid sa mga lagda kabahin sa pagpadagan og mga tricycles dinhi sa dakbayan.Ang Motorized Tricycle Regulatory Board (MTRB) motugot lang og 500 ka tricycles nga magdagan sa lain-laing kabarangayan dinhi sa dakbayan sa Sugbo.         

Aron dili modaghan ang mga tricycle, si Konsehal Jose Daluz III nga maoy misugyot sa ordinansa miingon nga usa lang ka tricycle ang itugot sa matag aplikante.         

Hinoon, dunay nagkanayon nga sayon ra kini malutsan kay mahimo man nga daghan ang mo-apply og Motorized Tricycle Operator’s Permit apan sakop ra gihapon sa mao nga pamilya.        

Gilatid sa ordinansa nga ang tricycle kinahanglang atimanon kanunay sa mga tag-iya ug dunay garahe nga kabutangan panahon sa gabii aron dili kini anha ra ibutang sa karsada.  Ang matag rota nga giandam na sa ordinansa gigahinan na og gidaghanon kun pila ka tricycle ang tugotan nga makadagan aron dili kini makamugna og grabeng problema sa trapiko.        

Gilatid usab nga kun mamatay ang tawo nga gihatagan og prangkisa, ang iyang asawa o bana mahimong katugotan nga makapadayon sa pag-operate sa tricycle.         

Ang matag tricycle hatagan og plate number nga susama og kolor apan butangan og barangay kun asa kini gitugotan nga makapamasahero.         

Matud ni Daluz nga ang mga tricycles kinahanglang kompleto sa suga ug nga ang momaneho niini duna g’yuy lisensya nga giisyu sa Land Transportation Office (LTO).         

Ang bayranan sa mo-apply pagkuha og permit moabot lang og P1,200.  (BANAT NEWS)