CEBU, Philippines - Gidakop sa kapolisan ang usa ka tawo nga nakalapas sa Comelec gun ban human masakmit gikan niini ang armas nga kalibre. 38 uban sa mga buhing bala sa barangay Cambiohan, dakbayan sa Danao ala 1:00 pasado ang takna sa miaging kaadlawon.
Si PO2 Roselo Campo miila sa gidakop nga mao si Eduardo Camaonggay, 43, minyo, ug usa ka drayber sa traysikad nga nagpuyo sa barangay Tuburan Sur, sa maong dakbayan.
Matud pa ni PO2 Campo nga ilang nadawat ang tawag sa telepono gikan sa usa ka nagpakabana nga molupyo sa maong dapit kinsa maoy nakasigpat sa suspetsado nga nagluklok og armas sa hawak.
Ang team sa kapolisan nga naglakip kanila ni Police Inspector Romeo Caacoy, PO2 Jomar Solomon ug PO2 Reagan Perilla maoy dali nga nakatubag sa maong alarma.
Dugang pa niya nga sa paghidangat sa maong dapit nila ni Inspector Caacoy ilang naabtan ang maong suspetsado nga nagpakitakita sa giluklok niyang armas nga maoy hinungdan sa gibating kahadlok sa mga tawo sa maong dapit.
Daling gisakmit ni Inspector Caacoy ang maong armas gikan sa maong suspetsado ug sa ilang pakisusi nasuta nila nga wala kini lisensiya maoy hinungdan nga kini gidakop ug gibalhog sa ilang detention cell.
Ang kasong kalapasan sa Comelec Gun Ban ug Republic Act 8294 kon illegal nga paghupot og armas nga walay lisensiya maoy ilang giandam nga kaso batok sa maong suspetsado nga ilang ipasaka sa buhatan sa piskaliya. (BANAT NEWS)