DOLE may reglamento sa panuhol sa semana santa
CEBU, Philippines - Ang Department of Labor and Employment (DOLE) mipagawas og reglamento sa panuweldo sa pribadong sektor karong umaabot nga Semana Santa.
Matud pa ni DOLE 7 Regional Executive Director Ma. Gloria Tango nga kung motrabaho ang usa ka empleyado sa Marso 28, Maundy Thursday ug Marso 29 o Good Friday nga mga regular holidays, bayaran kini og 200% sa iyang suweldo alang sa usa ka adlaw sa unang walo ka oras sa trabaho, apil na usab sa iyang COLA.
Kung ang empleyado dili motrabaho, bayaran pa gihapon siya og 100% sa iyang suweldo alang sa usa ka adlaw lakip sa iyang COLA.
Kun day-off ug motrabaho siya og overtime, dugang 30% ang ihatag sa iyang inoras nga rate sa maong adlaw.
Sa March 30, Black Saturday nga usa ka special non-working day, kun ang empleyado dili motrabaho, ipatuman ang “no work, no pay†principle gawas na lamang kun may polisiya ang kompaniya o kung adunay nakalatid sa ilang Collective Bargaining Agreement kalabot sa suholan sa special holiday.
Kun motrabaho, dugang nga 30% alang sa unang walo ka oras ug kun mag-overtime, bayaran siya og 30% sa iyang inoras nga rate.
Kung matumong sa rest day kon day off ug motrabaho pa gihapon, dugang nga 50% sa iyang daily rate alang sa unang walo ka oras ang ipatuman ug kung mag-overtime, bayaran og dugang 30% sa iyang inoras nga rate. (BANAT NEWS)
- Latest
