CEBU, Philippines - Gibasura sa City Prosecutor’s Office ang kasong libelo nga gipasaka batok sa editor ug reporter sa Banat News nga si Wenceslao Celendron ug Lesley Caminade-Vestil.
Ang reklamante sa maong kaso mao si Jessica S. Vasquez. Ang maong reklamo ni Vasquez mitumaw dihang si Vestil misuwat sa balita kabahin sa operasyon sa Criminal Investigation and Detection Group sa pagsikop sa usa ka “Jessica Vasquez†kinsa giingong maoy leader sa tulo ka mga babayeng ingong namaligya og lote nga dunay pekeng titulo.
Ang lahing duha nga nasikop mao sila si Rosita Villahermosa ug Amme Sacil.
Ang maong balita na-published niadtong Oktubre 12, 2012. Ang maong reklamante mitawag kaniadto sa Banat News ug mihimakak nga dili siya mao ang Jessica Vasquez nga gisikop sa CIDG.
Si Vestil misuwat og laing balita kabahin sa maong paghimakak ni Vasquez apan ang naulahi mihimakak kini nga mitawag siya sa Banat News ug nagpailang siya si Engr. Jessica F. Vasquez nga taga dakbayan sa Sugbo.
Ang tipik sa desisyon ni Anna Lou Fernandez-Cavada, Prosecutor II nagkanayon kini dili libelous ang balitang gisuwat ni Vestil tungod kay nagsubay lang kini sa joint-affidavit sa mga sakop sa CIDG kinsa nagpahigayon sa operasyon.
Nasuta nga walay malisya nga nalakip sa pagsuwat ni Vestil sa nahisgutang balita hinungdan nga gibasura kini sa city prosecutor’s office.
Ang maong desisyon ni Cavada niadtong Pebrero 26, 2013 giuyonan kini ni Oscar Capacio, Prosecutor IV ug Nicolas Sellon, Cebu City Prosecutor. (BANAT NEWS)