CEBU, Philippines - Duha ka bulto nga gituohang shabu ug laing tulo ka medium pack ug dise-otso ka mga gagmay’ng pakete ug high powered nga mga armas ang nasakmit sa City Intelligence Branch ug City Anti-Illegal Drugs Special Task Group diha sa barangay Calamba ning dakbayan sa Sugbo.
Pasado alas-8 gironda sa kapolisan sa CIB ang panimalay ni Atilano Zafra Quezon Jr. diha sa sitio Mahayahay pinasikad sa search warrant nga giluwatan ni RTC-Branch 17 Judge Silvestre Maamo.
Ang hepe sa CIB Chief Inspector Romeo Santander mibutyag nga nakadawat sila’g taho kalabot kang Quezon magrentahan og armas ang mga tulisan.
Matod pa ni Santander gawas sa mga armas nga mao lang unta ang ilang tuyo aduna silay nakitang duha ka bultong drugas.
Si Quezon wala diha sa iyang balay atol sa pagpangronda. Nakuha sa mga sakop sa CIB ang duha ka dagkong plastic sa gituohang shabu nga mobalor sa dul-an sa P200 mil; usa ka 12-gauge shotgun nga adunay tulo ka bala; duha ka kalibre .45 nga adunay duha ka magazine; usa ka .357 magnum revolver nga adunay lima ka bala ug usa ka kalibre .22 rifle.
Pasado alas-11 sa miaging gabii, wala usab makaugpo ang usa ka gihulagway nga level 3 drug pusher nga si Randy Pace, 32, human masikop sa kapolisan sa CAIDSOTG atol sa gipahigayong buybust operation diha sa sitio Lutaw barangay Sto. Niño.
Matud pa ni SPO1 Rolando Banatasa sa CAIDSOTG, nakuha gikan kang Pace ang tulo ka medium packs sa gituohang shabu ug laing 18 ka gagmay’ng pakete niini.
Si Pace nga gisuwayan unta sa pagkuha sa iyang habig ning tigbalita apan nagdumili sa pagpa-interview. (BANAT NEWS)