Isla sa Olango pabahaan og mga proyekto

CEBU, Philippines - Nagkalainlaing  mga  proyekto  ang  gipatuman  sa isla sa Olango  karong tuiga  matud pa ni Mayor Paz  Radaza. Usa  niini  mao  ang P2.5 milyones nga Material Recovery Facilities (MRF) sa Brgy. Sta. Rosa nga gisugdan  og trabaho  sa miaging  Lunes.

Kini  gitumong  aron  maayong  pagkahipos  ang  mga  basura  gikan sa 11 ka  barangay  sa  isla  sa Olango.

Matud   pa ni  Radaza  nga makapanguwarta  usab  niini  ang  mga  molupyo  kay   pinaagi  sa basura  nga  ipakaon  sa shredding machine makagama  sila  og  hollow block, plant box ug uban pa

Unya  mahimo  pa  nila  kining  abuno  sa mga  tanom  sama  sa utanon  ug  uban  pa.

Aron  maatiman  pag-ayo  ang maong  MRF ang kagamhanan  sa dakbayan mibansaybansay na sa 20 ka mga empleyado aron matudloan  sa mga paagi  sa pag-amping  sa maong  kahimanan.

Gawas niini gitakdang tukoron   usab ang   Mini Hoopsdome duol sa Mini City Hall sa Isla sa Olango sa Brgy. Talima nga mokantidad   og P15 milyones  diin ang P3 milyones niini gikan sa gahin ni Cong. Arturo “Boy” Radaza nga gipaagi sa DPWH.

Ang mini hoopsdome adunay   gidak-ong 1,215 metro quadrado  ug kini dugangan pa unya og 2 ka hektarya alang sa playground ug softball field sa kabataan.

Lakip sa proyekto nga nakalinya karong tuiga sa isla sa Olango mao ang pagsemento sa mga kadalanan palibot sa maong isla ug ang dugang pasilidad sa mini hospital sa maong isla.

Gipasabot ni Mayor Radaza nga nagdugang na sila og mga hospital equipment sama sa higdaanan,tambal ug dugang doktor ug mga nurse nga makaatiman sa mga pasyente  sa maong dapit sa dili pa kini dad-on sa mainland  hospital  sa  Lapulapu kung  anaa  na  kini  sa talandugong  kahimtang. Gumikan niini nahinangop pag-ayo  ang  mga molupyo  sa Olango  kay  mao  kini  ang  dugay  na  nilang  gipangandoy. (BANAT NEWS)