CEBU, Philippines - Si Mayor Michael Rama mopadayon paghatag og gasolina ngadto sa mga sakyanan nga dili iya sa City Hall bisan og kini nahasupak sa gilatid sa Cebu City Appropriation Ordinance karong tuiga.
Ang 13 ka konsehal, sagad mga alalay sa Bando Osmeña Pundok-Kauswagan (BOPK) mibasura sa gisugyot nga ordinansa ni Konsehal Jose Daluz III nga maghimo unta og kausaban sa budget ordinance.
Gusto nga ipausab ni Daluz mao ang lagda nga ang gastohan og gasolina mao ra ang mga “city vehicles†nga matud pa sa konsehal wala maglakip sa mga sakyanan sa kapolisan, fire trucks ug sa barangay.
Naandan na nga ang mga sakyanan sa kapolisan ug barangay apil nga hatagan og gasolina sa dakbayan. Matud ni Daluz nga dili maayo nga putlon sa dakbayan ang paghatag og gasolina sa maong mga sakyanan sa kapolisan ug sa barangay.
Nagbotasyon ang mga konsehal kun aprobahan ba nila o dili ang gisugyot nga ordinansa ni Daluz.
Sa 13 ka konsehal nga misupak nga aprobahan ang ordinansa naglakip nila ni Konsehal Ronald Cuenco nga usahay mahulagway nga alalay sa Team Rama.
Sila ra si Konsehal Daluz ug Edgardo Labella maoy misuporta aron aprobahan ang gisugyot nga kausaban. (BANAT NEWS)