CT-TODA mihangyo ponder nga traffic light ilisan

CEBU, Philippines - Ang City of Talisay-Traffic Operation Development Authority (CT-TODA) mopadangat og request ngadto sa rehiyonal nga buhatan sa Department of Public Works and Highways (DPWH) aron ang mga guba nga traffic lights sa kadalanan sa Talisay mailisan. Ang pundo nga gamiton sa maong proyekto gikan sa road user’s tax.

Si Bise Mayor Alan Bucao ug chairman sa CT-TODA mibutyag sa mga tigbalita nga niadtong milabay’ng semana dunay gipahigayong tigom tali sa CT-TODA, DPWH ug Land Transportation Office (LTO) diin usa sa ilang gituki ang kabahin sa mga guba na nga traffic lights. Matud ni Bucao nga si Engineer George Laroa sa DPWH nagkanayon nga pweding magamit ang road user’s tax alang sa maong proyekto nga pag-ilis sa upat ka mga traffic light diha sa Cebu South Coastal Road ug Tabunok.

Ang road user’s tax nakolekta kini gikan sa mga tag-iya og mga sakyanang pribado, pasaheroan ug lakip na sa gobiyerno.

Ang 80 porsyento sa nakolektang road user’s tax igahin kini ngadto sa proyekto alang sa kadalanan sama sa road maintenance ug pagpauswag sa mga road drainage.

Ang singko porsyento sa maong buhis igahin kini ngadto sa local road fund ug ang 7.5 porsyento igahin kini ngadto sa special vehicle population control fund ug ang sobra igahin ngadto sa road safety fund nga naglakip sa mga pagbutang og traffic lights ug ubang mga safety devices.

Ang bise mayor nagkanayon kini nga matag usa ka traffic light lakip na ang component niini nagkinahanglan og P1M nga budget. Ang siyudad nagplano nga ang mga ipuling traffic light duna kini lakip nga close circuit television (CCTV) camera.

Gibutyag usab ni Bucao nga ang hepe sa mga enforcers nga si Almond Keith Dela Peña duna nay nakitang supplier sa traffic lights. Sa pagkakaron ang mga traffic light diha sa CSCR ug Tabunok gipaubos una kini sa manual o dunay tawo nga mag-operate sa control.

Kahinumduman nga sa milabay’ng  mga buwan ang mga motorista nga moagi diha sa CSCR ang nagreklamo tungod kay nabalaka sila dihang mga traffic light nangaguba kini.

Si Bucao midugang nga ang traffic light karon diha sa kadalanan sa siyudad mga karaan na ug nangasunog ang mother board ug gani ilaha lang una kining giayom-ayom samtang wala pay ikapuli niini. (BANAT NEWS)