CEBU, Philippines - Gidayeg ni Regional Director Rodolfo Inson sa Department of Agrarian Reform (DAR)7ang iyang mga opisyal ug tanang empleyado tungod kay nakab-ot niini ang 121 porsento nga target sa naapod-apod na nga mga luna sa tagsa-tagsa ka benepisyaryo niini sa rehiyon 7.
Gitug-an ni Inson nga nakuha gayud sa DAR-7 ang gi-target niining mga luna nga ipamahin-bahin ngadto sa mga benepisyaryo ubos sa Comprehensive Agrarian Reform Program (CARP) alang sa tuig 2012.
Samtang si Atty. Johnson Sinco, Assistant Regional Director for Operations (ARDO) nagkanayon ang DAR-7 nakapang-apod-apod na sa katibuk-ang 4, 385 ka ektaryang luna ngadto sa mga benepisyaryo niini.
Niining mga lunaa, 1,290 ka benepisyaryo ang nakadawat sa 1,394 ka ektarya nga yuta sa kaumahan sa probinsya sa Bohol.
Sa Sugbo mikabat sa 1, 016 ka ektaryang yuta nga gihatag ngadto sa 933 ka benepisyaryo, samtang ang Negros Oriental may 1, 976 ka ektaryang yuta nga gihatag ngadto sa 2, 123 ka benepisyaryo.
Matud pa ni Inson nga ning tuiga, ang DAR 7 magpadayon sa pagpang-apod sa mokabat 4, 883 ka ektaryang agrikultural nga yuta ngadto sa mga benepisyaryo niini.
Sukad sa tuig 1972 hangtod tuig 2012, ang DAR-7 nakapang-apod-apod na og 181, 878 ka ektarya sa yuta nga pang-agrikultura ngadto sa mikabat sa 140, 781 ka mga mag-uumang benepisyaryo. (BANAT NEWS)