CEBU, Philippines - Usa ka gipasanginlang sakop sa grupong Ozamis robbery group nga usa sa nanulis sa usa ka jewelry shop diha sa may Mango Avenue niadtong tuig 2008 ang nadakpan sa kapolisan didto sa Misamis Occidental. Si Felbert Mata alyas Kokoy, 35, nalutsan og warrant of arrest sa kasong kalapasan sa ginadiling drugas kon RA9165 ug kalapasan sa illegal nga paghupot og armas nga RA 8294.
Matud pa sa hepe sa kapolisan sa Investigation ang Detection Management Branch Chief Inspector Alexis Relado nga ang warrant of arrest pinirmahan nilang Presiding Judge Macaunda Hajirasul ug Presiding Jusge Gilbert Moises.
Si Mata nadakpan sa mga sakop sa Oroquita police ug IDMB sa Cebu City Police Office uban sa laing sakop sa maong robbery gang nga si Roy Doroño diha sa lungsod sa Bonifacio, Misamis Occidental.
Butyag pa ni Relado nga dihang ila untang gi-serve ang warrant of arrest batok kang Mata, naatlan nga diha si Doroño sa balay ug giingong misuway og pinusilay sa mga polis apan wala makaigo ug nadakpan ra usab kini dayon.
Dugang pa ni Relado nga si Mata nakaeskapo kaniadto sa gipahigayong buy-bust operation sa kapolisan ug didto nagpabugnaw sa Mindanao. Si Mata wala motingog dihang gipangutana kung sakop ba gyud siya sa maong notadong robbery group.
Kahinumduman nga niadtong tuig 2008 buwan sa Disyembre gitulis sa grupo ni Roy Quimada uban si Mata, Golden Treasures, diha sa may Mango Avenue sa Cebu City. (BANAT NEWS)