Minero gibanhigan ug gipatay

CEBU, Philippines - Namatay   dihadiha  ang usa ka minero  human  kini  pusila sa mga kauban  niya  sa  trabaho   nga  mibanhig  kaniya didto sa bukirang bahin sa Sitio Mahayahay barangay Alambihud sa lungsod sa Argao sa miaging udto. 

Ang biktima mao si Ireneo Ortiz Carillo, 38, minyo, trabahante  sa mina  sa carbon  nga  gipanag-iya   sa GAA Coalmine sa barangay Gaa,  apan nagpuyo sa barangay  Dugo-an, lungsod sa Sibonga.

Ang  mga suspetsadong  mibanhig  ug mipusil patay  kaniya  mao sila  si Angelito Ejalon, 28, maintenance  worker  sa ilang  trabahoan  ug  si Roman  Montejo, 31, general foreman  sa  Alta Tiera Development  and Mining Corp.  nga nagbase gihapon  sa  Argao.

Si PO3 Rodrigo Teo sa Argao Police Station mibutyag  sa  Banat  News nga nagsakay  sa  iyang  motorsiklo ang biktima  paingon  sa ilang balay aron maniudto  gikan  sa iyang  trabahoan.

Apan   sa  pag-abot niini  sa maong lugar wala kini makabantay nga nag-atang nang   daan ang  mga suspetsado  kaniya kinsa  mipauwan  og  mga  bala  sa biktima  nga  misangpot  sa pagkatagak  niini  sa  yuta  ug  namatay  ug diha-diha  gibiyaan  dayon  sa  mga suspetsado.

Apan ang  kapolisan kinsa  nakadawat  og tip  gikan  sa molupyong  nagpakabana  bahin  sa miluthang  patay  sa biktima,  miadto  kagahapon  sa gitrabahoan  sa biktima  diin  didto  usab  si Ejalon nga maoy  usa  sa  mga  suspetsado  nga  mikobra  sa iyang  suweldo. 

Diha-diha  gisikop kini  sa kapolisan ug  miangkon  nga  siya  maoy  miluthang  sa biktima  samtang  iya usab  nga gibutyag  nga  si Montejo  maoy  nagmaneho  sa motorsiklo  nga  ilang  gisakyan .

Pipila  ka  takna  nasikop  usab  sa kapolisan  si  Montejo  ug  karon nagtingkagol  na  silang  duha  sa prisohan  samtang nagpaabot  sa tukmang  kiha  nga  ipasaka  sa mga kabanay  sa biktima  batok  kanila.

Ang  mga  suspek  kinsa  nasakmitan  og  armas  de fuego  ang  usa ug  usa ,nagkanayon  nga  naggumikan  lang  sa suya-suya  sa trabaho  ang  tanan.

Si Ejalon  mipasangil  usab  sa  biktima  nga  mibahad  kaniya  nga kuno   patyon siya  niini, hinungdan  nga   iya  na lang  usab  nga  giunhan pagpusil. (BANAT NEWS)