Masiao usher natiklo ug napriso

CEBU, Philippines - Nasikop   sa mga  kapolisan ang usa ka 72 anyos nga lalaki nga naaktohang  namaligya  og  tiket  sa masiao   sa dalan S. Osmeña ug eskina G.Y.  dela Serna sa barangay Gun-ob, dakbayan sa Lapulapu sa miaging  hapon.

Ang nadakpan mao si Francisco Dico Nunez, minyo, nga nagpuyo sa maong dapit kinsa nasakmitan sa kapolisan og  nagkalainlaing tip sheet sa masiao nga  may  mga  kombinasyon sa numero sa illegal nga sugal, calculator, ball pen ug salapi nga gituohang halin niini. Si PO1  Junel Mayola sa kapolisan sa Presinto 3 sa Lapulapu City Police Office (LLCPO) miingon nga daan na nila  nga namatikdan ang illegal nga kalihokan sa maong suspetsado nga magsuroysuroy  sa barangay Poblacion ug merkado publiko sa maong dakbayan.

Matud pa ni PO1 Mayola  nga ang team sa kapolisan nga gilangkoban ni PO2 Erwin Suson maoy nakasigpat sa maong suspetsado nga nangisyo  og numero sa masiao ngadto sa  mga drayber  sa traysikol  ug mga vendor.

Dali nga gisita nila ni PO2  Sunson ang suspetsado kinsa  midali-dali  usab  og  hipos  sa mga ebidensiya nga sama sa  kahimanan sa maong illegal  nga sugal    busa gisikop dayon  kini  sa kapolisan  ug  gibalhug  sa bilanggoan. (BANAT NEWS)

Show comments