CEBU, Philippines - Nadakpan na sa kapulisan ang lalaki nga giingong nitulis ug nipusil sa usa ka babayeng estudyante sa Cebu Institute of Technology-University, diha sa sitio Ciculco, Barangay Labangon niadtong Biyernes sa gabii.
Giila sa kapulisan ang suspetsado nga si Quid Reyes Abella, 21, mulopyo sa maong lugar, kinsa nakuhaan usab og armas ug duha ka pakete sa gidudahang shabu.
Si PO1 John Klyde Valera sa Punta Princesa Police Station miingon dunay mga saksi nga positibong miila kang Abella nga maoy mitulis ug nipusil kang Ralene Lagudas, 19, ug usa ka Architecture major sa CIT-U niadtong Martes sa gabii.
“Nailhan siya tungod sa patik sa iyang braso,†matud pa ni PO1 Valera.
Ang suspek, matud pa sa kapulisan, nisuway pa og tago ilawom sa ilang balay apan nadakpan ra gyud gihapon kini alas 11:50 niaging Biyernes sa gabii.
Nakuha gikan ni Abella ang usa ka kalibre .38 nga rebolber nga dunay upat ka buhing bala ug duha ka kabhang sulod sa cylinder niini. Nakuhaan usab siya og duha ka tag-as nga pakete may sulod nga gituohang shabu.
Ang suspek hugtanong mihimakak sa pasangil, matud pa ni Valera. Wala usab giila sa suspek ang iyang kauban.
Ang suspek natanggong karon sa prisohan sa maong presinto ug gikatakdang pasakaan og kasong illegal possession of firearms, paglapas sa Comelec gun ban, ug paghupot og ilegal nga drugas. Madugang pa niini ang kasong pagpanulis ug pagpusil sa biktima.
Kahinumduman nga si Lagudas ang naglakaw sa dalan Salvador Ext. eskina Tres de Abril St. sa barangay Labangon Martes sa gabii dihang duha ka lalaki nga angkas sa usa ka motorsiklo ang niduol kaniya ug nideklarar og hold-up.
Ang biktima misuway sa pagsukol apan gipusil na hinuon kini sa iyang ilokan. Ang mga suspek nisibat dala ang IPhone cellphone sa biktima.
Ang biktima anaa pa karon sa ospital apan luwas na sa makuyaw nga kahimtang. (BANAT NEWS)