CEBU, Philippines - Gipusposan hangtud nga namatay sa usa ka anak ang iyang amahan tungod sa giingong palahubog ug magsige og panghagis diha sa ilahang balay sa Sitio Danawan sa barangay Alang-alang sa lungsod sa Tabogon niadtong Martes sa alas 5:00 sa hapon.
\Ang biktima nga patay diha-diha mao si Teofilo Mahusay, 63, nagpuyo sa maong lugar. Ang suspek mao ang iyahang anak nga si Esteban Mahusay, 38.
Matud ni PO3 Efipanio Comedido sa Tabogon Police dihang nahinabi sa Banat News naglalis ang biktima ug ang suspek hangtud nga sila nag-away tungod kay hubog na usab ang biktima ug nanghagis sa iyang mga anak.
Gikatahong wala makapugong ang suspek ug mipunit og kahoy ug gihapsan ang amahan diha sa ulo ug natumba og diretso og kamatay.
Human niini, ang suspek miadto sa police station ug mitug-an sa iyang nahimo. Ang mga silingan mihulagway sa namatay nga kanunay magmaoy ug manghagis sa mga anak sumala pa ni Comedido.
Gani ang asawa niini atua na sa anak niini sa Manila magpuyo tungod kay kanunay dapatan sa biktima. Hangtud kagahapong adlawa ang kapulisan nagpaabot sa mga kabanay kung mopasaka sila og kaso batok sa suspek. (/EIM)(BANAT NEWS)