Oil spill sa natikyaob nga barko gikabalaka sa opon

CEBU, Philippines - Dako ang kabalaka ni Lapulapu City Mayor Paz Radaza sa oil spill gikan sa natikyaob nga cargo vessel sa Cabahug Wharf sa Brgy. Looc dakbayan sa Mandaue sa milabay’ng adlaw.

Matud sa mayor kinahanglang mahabwa sa labing daling panahon   ang petrolyo  gikan sa ilawom sa maong barko  una pa kini makamugna og kadaut sa kinaiyahan sa dagat sa Mactan Channel.

Ang MV Angelica Grace nga dunay kargang mga truck vans nga may sulod nga mga sinakong bugas ug asukar ang kalit nga natikyaob niadtong Lunes sa gabii samtang padung na untang molawig sa Masbate.

Gikabalak-an ni Radaza nga adto mapunta ang oil spill sa dakbayan sa Lapulapu ilabi na kung kusog  ang sulog sa dagat.

Lakip sa maapektuhan sa oil spill mao ang Brgy. Pajo, Poblacion, Pusok ug Brgy. Looc dakbayan sa Lapulapu kansang mga residente sa baybayon nagsalig sa ilang panginabuhian sa dagat.

Sama sa nahitabo sa usa ka barkong nagkarga og semento nga nalunod sa milabay’ng tuig sa kadagatan sa Brgy. Canjulao unang lakang nga gihimo sa mga sakop sa Coast Guard mao ang pagkuha sa lana sa maong barko ug uban pang kimikal nga makadaut sa kinaiyahan sa dagat. (BANAT NEWS)