Minus ang gi-dengue karong tuiga

CEBU, Philippines - Mas minus ang mga kaso sa dengue dinhi sa dakbayan sa Sugbo sa buwan sa Enero ug Pebrero karong tuiga kun itandi kaniadtong miaging  tuig.

Mao kini ang gibutyag ni Durinda Macasocol nga maoy assistant chief sa City Epidemiology Statistics and Surveillance Unit sa Cebu City Health department.

Matud ni Macasocol nga sa unang duha ka buwan karong tuiga duna la’y 439 ka kaso sa dengue kang kansang mga biktima na-admit sa ospital.

Sa Enero ug Pebrero kaniadtong miaging tuig miabot og 535 ka kaso sa dengue ang natala dinhi sa dakbayan sa Sugbo. Hinoon, tulo ang patay sa unang duha ka buwan sa miaging tuig, samtang usa lang karong tuiga.

Basi sa talaan sa City Epidemiology Statistics and Surveillance Unit nagpakita nga ang Talamban maoy labing daghan og kaso sa dengue ug dili na ang Guadalupe.

Ang Barangay Guadalupe nga maoy labing daku nga barangay sa dakbayan ug kanunay’ng nag-una nga labing daghan og kaso sa dengue nabutang lang sa ika-12 nga lugar.

Gawas sa Talamban, ang labing daghan og mga kaso sa dengue mao ang Mambaling, Mabolo, Quiot, Tisa, Calamba, Labangon, Inayawan, Lahug, Sambag 1, Dulho-Fatima ug Guadalupe. (BANAT NEWS)