PJ mihagit sa kaatbang sa LP ipadayon ang lifestyle check
CEBU, Philippines - Gihagit ni gubernatorial candidate Cong. Pablo John Garcia ang kaatbang niining kandidato sa pagpadayon sa bahad niining ipa-lifestyle check siya ngadto sa Ombudsman Visayas.
Matud pa ni Garcia nga andam kaayo siyang motubag niini ilabi na kabahin sa gipasangil nga duna siya’y mansion sa barangay Guadalupe sa syudad sa Sugbo nga nagkantidad og sobra 20 milyones ka pesos.
Una niini si Liberal Party gubernatorial candidate Hilario Junjun Davide mipadayag nga nagplano siyang ipa-lifestyle check si Garcia tungod sa mga propiyedad niini nga nakapaduda kaniya kung asa gikan.
"Sayon ra man kaayo pagsulti nga usa ka mansion. Pero unsaon man na pagkamansyon sa akong balay nga upat ra man na ka kwarto. I-file na ang iyang lifestyle check kay andam ‘tang motubag ana ug ako na mismo ang moadto sa Ombudsman ug mosulti kun giunsa na paghimo nang balaya,†sigon pa ni Garcia.
Gipadayag usab ni Garcia nga mosumbalik ra gihapon kining gihimo sa iyang kaatbang nga pagpanggukod kaniya ug sa iyang pamilya.
Sayod siya nga ang tumong sa iyang kaatbang sa politika aron lang gyud mapintalan og daotang imahen ang iyang pagkatawo ug ang iyang pamilya.
Masaligon siya nga ang mga tawo ray mohukom unya kanila sa panahon sa eleksyon. (BANAT NEWS)
- Latest
